O Concello felicita ao piragüista local polo seu novo éxito deportivo .

Vilaboa,  1  de xuño de 2026. – O Concello de Vilaboa felicita ao piragüista local Brais Sánchez polos seus resultados no Campionato de España no que conseguiu un excelente resultado ao ser campión sénior absoluto en K2. Este resultado consolida a excelente tempada para o palista local, que a falta de confirmación oficial, representará a selección Española no Campionato Europeo, que se disputará en Rumanía.

Na proba sénior, Sánchez mostrou unha vez máis o seu alto nivel competitivo, medíndose con deportistas de elite e mantendo a súa solvencia nas grandes citas nacionais.

A traxectoria recente de Sánchez inclúe varios cambios significativos. Despois de 25 anos defendendo as cores do Club Piragüismo Vilaboa, decidiu unirse ao Club Los Rápidos Jaire de Arriondas co obxectivo de formar equipo en K2 co seu amigo Emilio Llamedo para participar no tradicional Descenso Internacional do Sella, unha das probas máis emblemáticas do calendario nacional.

Tras esa experiencia asturiana, o piragüista optou por regresar a Galicia para integrarse no Club Rías Baixas de Boiro. Esta decisión respondía á súa vontade de afrontar a competición cunha perspectiva diferente, segundo el mesmo explicou, para “xubilarse” deportivamente nun proxecto no que aportar a súa experiencia acumulada e adestrar con menor presión competitiva.

Foi precisamente con este enfoque máis relaxado cando Sánchez alcanzou algúns dos seus resultados máis destacados a nivel internacional. No último ano logrou un notable quinto posto no Campionato do Mundo de Maratón, así como medallas de ouro e prata no Mundial de Barco Dragón 2024, consolidando a súa versatilidade e capacidade para competir con éxito en distintas modalidades. Estes logros demostran a calidade e consistencia do deportista de Vilaboa, que continúa colleitando éxitos e representando con orgullo á súa localidade en competicións nacionais e internacionais. Con todo, Sánchez lamenta as dificultades que afrontan os piragüistas para atopar patrocinios, fundamentais para cubrir desprazamentos e adquirir material técnico imprescindible para competir ao máximo nivel.

Tres mestas de Guitiriz, Córdoba e Cuba elixen o Centro Agrupado pola súa calidade educativa e describen a experiencia como “inspiradora e inesquedible”.

Vilaboa,  11  de maio de 2026. – O CRA de Vilaboa despedíu estes días ao seu profesorado en prácticas, tres mestras que escolleron este centro pola súa reputación, polas referencias recibidas e pola calidade educativa que o caracteriza. Unha elección que, como elas mesmas recoñeceron, non foi casual: o CRA é un espazo vivo, innovador e profundamente humano, onde a educación se constrúe desde a proximidade, o respecto e a creatividade.

As mestras Xelo Teijido Teijido, natural de Guitiriz e estudante da UVigo; Araceli Carbonell de los Ríos, natural de Córdoba e alumna da Universidad Loyola Andalucía; e Yolanda Aribú Pedreira, nacida en Cuba e residente en Moaña, tamén da UVigo, completaron aquí unha etapa formativa que describen como “intensa, inspiradora e chea de aprendizaxes reais”.

Durante estes meses compartiron aulas, proxectos e vida co alumnado das cinco escolas do CRA, coñecendo de primeira man un modelo educativo que aposta polo acompañamento individual, a participación das familias e o vínculo coa comunidade. Levan con elas a experiencia dun centro que educa desde o afecto e a profesionalidade, e que deixa pegada.

Desde o Concello de Vilaboa e desde o propio CRA agradécese o seu compromiso, a súa implicación e a súa mirada fresca, que sempre suma. As portas quedan abertas para futuras colaboracións e para que esta etapa sexa só o inicio dun camiño profesional cheo de éxitos. Así llo trasladou a directora do CRA Conchita Pérez e o alcalde de Vilaboa, César Poza, na recepción ofrecida na sede do Centro Rural Agrupado.

Os Areeiros e Costas destacan entre as adegas da IXP Ribeiras do Morrazo, mentres que Elisa Ruibal e Roberto da Lufiña lideran os premios dos colleiteiros nunha edición marcada polo humor do pregón e un ambientazo continuo.

Vilaboa,  10  de maio de 2026. – A XIII Festa do Viño de Vilaboa pechou esta edición cun balance moi positivo, tanto pola elevada participación como pola calidade dos viños presentados á cata oficial. O recinto baixo o viaduto de Riomaior mantivo durante toda a xornada un ambiente vivo, alegre e constante, consolidando a cita como un dos encontros enogastronómicos máis recoñecidos da comarca.

A entrega de premios da cata foi un dos momentos centrais do día e deixou patente o bo nivel das adegas e colleiteiros do municipio. No apartado das adegas da IXP Ribeiras do Morrazo, Os Areeiros acadou a prata en branco e o ouro en tinto, mentres que Ardán obtivo a prata en tinto e Costas de Exportación levou o ouro en branco, confirmando a diversidade e personalidade dos viños elaborados no territorio.

Entre os viticultores, o xurado recoñeceu tamén o traballo das colleitas familiares, que cada ano gañan peso e prestixio dentro da festa. Nos tintos, o primeiro premio foi para Elisa Ruibal, seguida de Roberto da Lufiña e Martín Torres. Nos brancos, o primeiro posto recaeu en Roberto da Lufiña, o segundo en Antonio Juncal e o terceiro en Manuel Collazo Fernández, nunha edición especialmente competida pola calidade das mostras presentadas.

Durante a entrega, o alcalde de Vilaboa, César Poza, destacou “a calidade excepcional da produción vitivinícola do municipio, tanto nas adegas como nos viticultores, que cada ano demostran un compromiso admirable coa terra e co produto”. O rexedor subliñou que a Festa do Viño “é xa un escaparate consolidado da identidade local e un punto de encontro para quen valora o traballo das familias produtoras”.

César Poza, acompañado polas concelleiras Carmen Gallego, María Canosa e María del Carmen González, aproveitou para facer unha chamada de atención sobre o futuro do mar e do agro. Reivindicou das administracións unha maior implicación fronte ao cambio climático e ás consecuencias que xa está a ter no sector primario, un dos piares de identidade e economía de Vilaboa.

O pregón, a cargo de Sobria e Serena, meteu ao público no peto: o seu humor, moi pegado á realidade dun municipio rural como Vilaboa, arrincou máis dunha sorrisa e preparou o ambiente para unha xornada festiva e reivindicativa ao tempo e puxo a nota máis celebrada da mañá cunha intervención de humor exquisito moi aplaudida. A música de Mallou, dentro do programa +Música da Deputación, animou a sesión vermú e contribuíu a un ambientazo continuo, con asistentes de todas as idades e unha participación que superou as expectativas da organización.

O Concello de Vilaboa fai un balance moi satisfactorio desta XIII edición, que confirma a Festa do Viño como unha cita imprescindible para a promoción do territorio, do produto local e da convivencia veciñal.

O sector primario analiza sen concesións os efectos do cambio climático e debuxa as liñas de adaptación para garantir o futuro produtivo.

Vilaboa,  8  de maio de 2026. – A Festa do Viño e do Mar de Vilaboa botou a andar esta tarde cunha sesión de debate que puxo o foco na situación actual dos dous piares produtivos do municipio —o viñedo e os recursos mariños— e nas consecuencias que o cambio climático está a provocar neles. Baixo o título “Entre Mares e Cepas”, a xornada reuniu voces científicas e profesionais que debuxaron un diagnóstico claro, sinalando preocupacións pero tamén liñas de traballo estratéxicas para garantir a produtividade e a rendabilidade futuras.

Na mesa dedicada ao viñedo, “Innovación e sustentabilidade para o viñedo do futuro”, interviñeron Juan Carlos Vázquez Abal, enxeñeiro técnico agrícola da Estación de Viticultura e Enoloxía de Galicia; Tamara Canle e Ángela Yuste, técnicas de Paco & Lola; e Cristina Carrera, responsable de Agrovitis. Os expertos coincidiron en que o viñedo atlántico, pola súa natureza e polas variedades de maduración máis lenta, está a sufrir un impacto menor que outras zonas, mais advertiron da necesidades de innovar e seleccionar novos patrón mais residentes á sequía.

A reordenación das plantacións cara a cotas máis altas, o control da fertilidade e equilibrios do solo que fan ó viñedo acadar millores equilibrios da maduración, a transición do emparrado ás pérgolas para reducir o estrés hídrico e a aposta por unha viticultura ecolóxica e artesanal como unha das claves de diferenciación das elaboracions foron algunhas das medidas sinaladas para adaptarse ao novo escenario climático. O debate abordou tamén o relevo xeracional, apuntando ao enoturismo e á creación de empresas de servizos como vías de futuro para fortalecer o sector e garantir apoio técnico aos viticultores.

Outro dos puntos centrais foi a preocupación pola conservación dos dereitos de plantación. Vázquez Abal animou aos produtores a explorar fórmulas que aseguren a rendabilidade das explotacións e lembrou a importancia de cumprir os trámites administrativos en caso de decidir o arranque das viñas.

A segunda mesa reuniu a Elsa Vázquez Otero, catedrática da Universidade de Vigo; José M. Fernández Babarro, científico do IIM-CSIC; e José Manuel Parada Encisa, consultor en pesca artesanal e marisqueo, para analizar a situación crítica dos cultivos de bivalvos. Os expertos explicaron como a ciencia permite anticipar episodios de elevada mortalidade e subliñaron a necesidade de que as administracións activen medidas de apoio que permitan frear o deterioro dos bancos marisqueiros e garantir a continuidade dunha actividade esencial para a economía local.

A partir das 19.00 horas abrirán as casetas na carpa situada baixo o viaduto de Riomaior, onde cinco viticultores e tres adegas do municipio ofrecerán os seus produtos xunto con postos de artesanía e gastronomía. A oferta culinaria estará representada polo Bar O Chancho, a Pulpería Selecta, Ostras Tito e a Pastelería Os Laranxos, completando unha fin de semana que combina reflexión, identidade e celebración.

A primeira xornada da Festa remata co concerto da Banda da Escola de Música de Vilaboa e a Banda de Música Artística de Bueu

Vilaboa,  1  de maio de 2026. – O Concello de Vilaboa viviu unha nova edición do seu tradicional Festival dos Maios nun ambiente lúdico, participativo e cheo desa retranca que converte esta celebración nun dos encontros máis singulares do municipio. Tres creacións concorreron ao certame deste ano, elaboradas pola veciñanza Figueirido, polo CRA de Figueirido e polo Club de Xubilados de Vilaboa, que acadaron o primeiro, segundo e terceiro premio respectivamente.

A xornada desenvolveuse nun auditorio ao aire libre que volveu demostrar a súa idoneidade para este tipo de eventos, reunindo a persoas de todas as idades arredor dun mesmo fío condutor: a ironía e a crítica social expresadas con humor, imaxinación e moito talento colectivo.

Os máis pequenos do CRA de Figueirido aproveitaron o seu Maio para reivindicar melloras nas instalacións da súa aula, mentres que a rapazada de Figueirido ampliou o foco a outros ámbitos da actualidade local. Entre as súas sátiras lembraron que, durante os temporais, o alcalde César Poza propuxera pechar os centros educativos, sendo finalmente a Xunta quen decidiu manter as clases “para evitar que estiveran coa Play”, segundo recolleron con humor. Tamén fixeron referencia ao enfado inicial da veciñanza de Paredes polas obras da Pump Track, aínda que agora —ironizaron— “alucinan co que facturan no bar”.

Pola súa banda, o Maio do Club de Xubilados fixo un percorrido pola actualidade estatal e autonómica, combinando retranca e crítica amable para abordar algúns dos rumores que circulan polo municipio. Non esqueceron tampouco o debate xerado pola reubicación dos contedores para adaptarse aos novos camións de carga lateral, motivo polo que hoxe pedían entre risas “patinetes para chegar”.

A celebración estivo amenizada pola música de DJ Milucho e polo grupo “Al ritmo de Adri”, que contribuíron a crear unha atmosfera festiva e dinámica durante toda a mañá. O público acompañou con entusiasmo cada intervención, consolidando unha vez máis o Festival dos Maios como unha cita imprescindible no calendario cultural de Vilaboa.

Este campamento desenvolverá entre o CEP e a Casa de Cultura e priorizará á cativada empadroada en Vilaboa.

Vilaboa,  29  de abril de 2026. – O Concello de Vilaboa pon en marcha unha nova edición do seu programa de conciliación familiar para as vindeiras vacacións estivais, Vilaverán, que oferta actividades lúdico-formativas para rapaces e rapazas de entre 3 e 14 anos durante os meses de verán. Nesta edición, na que as persoas interesadas poderán formalizar a súa inscrición desde o día 4 ata o 26 de maio, o Concello mantén as novidades da edición anterior para favorecer a conciliación da vida persoal, familiar e profesional, mantendo ao mesmo tempo as 400 prazas distribuídas en quendas de 15 días.

Co obxectivo de adaptarse ás necesidades das familias, Vilaverán ofrecerá de novo dúas opcións horarias, ampliando o horario máis extenso desde as 7.30 ata as 15.30 horas e mantendo o horario ordinario entre as 9.00 e as 14.00 horas. Os prezos varían en función da franxa escollida e sitúanse entre os 60 e os 40 euros por quincena, con matrícula gratuíta para as familias usuarias dos Servizos Sociais municipais.
Mantense tamén a baremación de acceso, que establece prioridade para os nenos e nenas empadroados en Vilaboa, para menores escolarizados nos centros educativos do municipio e para fillos e fillas de familias que traballen no termo municipal, reforzando así o obxectivo de facilitar a conciliación. Tamén terán prioridade as vítimas de violencia de xénero, as familias monoparentais e os menores con distintos graos de discapacidade.

A actividade desenvolverase entre as instalacións do Colexio Plurilingüe de Riomaior e a Casa de Cultura, configurándose como un campamento de verán dirixido á poboación infantil e xuvenil que permite gozar de actividades educativas durante o período estival, de luns a venres, durante os meses de xullo e agosto. O programa ofrece ás familias unha ferramenta eficaz para conciliar, ao tempo que promove valores de co-responsabilidade, convivencia e participación. Unha das sinais de identidade do Vilaverán é a aposta por actividades ao aire libre e en contacto coa natureza, aproveitando os recursos e espazos do municipio.

O Concello publicará as listas provisionais o 5 de xuño e as definitivas o 11 de xuño.

A edición deste ano homenaxeou a traxectoria vital e profesional de Divina Boullosa Rodríguez, veciña do Alcouce de 89 anos.

Vilaboa,  26 de abril de 2026. – Máis de 200 persoas secundaron este domingo a convocatoria da Comunidade de Montes e da Asociación de Veciños de San Andrés para participar na IV Comida de Confraternidade de Figueirido, un encontro que busca reforzar os lazos comunitarios e recoñecer a traxectoria de persoas que teñen contribuído de maneira destacada á vida social da parroquia.

Nesta edición, a homenaxe recaeu en Divina Boullosa Rodríguez, de 89 anos, nacida no Alcouce o 6 de decembro de 1936, apenas cinco meses despois do estalido da Guerra Civil. A súa infancia e xuventude, como a de tantas persoas da súa xeración, estiveron marcadas polas dificultades dunha guerra, dunha longa posguerra e dunha ditadura que condicionou profundamente a vida no rural.

Divina Boullosa recibiu agasallos tanto da Comunidade de Montes e Asociación de Veciños, como de César Poza, alcalde de Vilaboa, que lle fixo entrega dunha peza de función dun dos elementos patrimoniais máis importantes do municipio, a paneira da Rectoral

Divina estudou na escola pública de Figueirido e, ao rematar a formación primaria, decidiu dedicarse á costura, unha das poucas opcións profesionais ás que podían acceder as mulleres do rural naquela época. Formouse nunha academia de corte e confección en Pontevedra e, en 1959, casou con Constantino Lamoso Couso, veciño moi implicado nas necesidades da comunidade, alcalde de Vilaboa e impulsor de iniciativas fundamentais para o avance da parroquia, como a fundación da Asociación de Veciños, a comisión do cemiterio, as traídas de augas ou a propia Comunidade de Montes. Para el hubo tamén un emotivo e entrañable recordo. César Poza, que pediu un cariño aplauso para quen foi o seu antecesor, que recoñeceu o impulso que durante os seus mandatos lle dou ás infraestruturas básicas do municipio e asegurou que o fixo coa complicidade da súa dona, “porque naquela época para que moitos homes se adicaran á vida pública, as mulleres asumían casi exclusivamente o coidado da casa e da familia”.

Xuntos compartiron 64 anos de matrimonio na súa casa de Balteiro, sempre dispostos a axudar aos seus veciños. A parella tivo dous fillos, Tino e Ludi, e tres netas: Sara, Laura e Andrea. En 2023 Divina sufriu a perda do seu home, un golpe moi duro dada a estreita unión que sempre mantiveron.

Lonxe de deixarse frear polas limitacións da época, Divina decidiu emprender e abriu no seu domicilio un taller de costura ao que dedicou máis de catro décadas de traballo, sempre coa radio como compañeira inseparable. Aquel pequeno obradoiro non só foi o seu sustento, senón tamén un espazo de aprendizaxe e encontro polo que pasaron xeracións de mulleres de Figueirido e arredores ata 1993, ano no que puxo fin á súa actividade profesional como modista.

A súa filla Ludi, que a acompañou durante a homenaxe, quixo compartir este recoñecemento coas moitas mozas que acudiron ao taller da súa nai hai xa moitas décadas, un centro no que se teceron moitas relacións confraternais.

Coa homenaxe deste domingo, a Comunidade de Montes e a Asociación de Veciños quixeron recoñecer o valor, a perseveranza e o espírito emprendedor dunha muller que, nun tempo no que as mulleres estaban relegadas ao ámbito doméstico, decidiu construír o seu propio camiño profesional e contribuír ao desenvolvemento económico, social e persoal doutras mulleres da parroquia.

A xornada estivo acompañada dun xantar de confraternidade e da música do trío Armonía, que puxo o broche festivo a un encontro que xa se consolidou como unha cita anual de referencia para a comunidade de Figueirido.

A xornada “Entre mareas e cepas” reunirá voces científicas e profesionais para analizar o futuro do marisqueo e da viticultura.

Vilaboa,  24 de abril de 2026. – A adega Os Areeiros acolleu esta mañá a presentación da Festa do Viño de Vilaboa 2026, que se celebrará en Riomaior os días 8, 9 e 10 de maio. O alcalde, César Poza, e a concelleira de Promoción Económica, Carmen Gallego, explicaron que esta edición incorpora un guiño especial aos produtos do mar, despois de que o sector marisqueiro renunciase este ano ao seu evento propio pola situación de precariedade que atravesa. Ambos coincidiron en que é necesario “acompañar ao sector e facer visible un momento especialmente delicado para as familias que viven do mar”.

A programación abrirase o venres 8 de maio ás 17:00 horas na Casa da Cultura de Riomaior coa xornada “Entre mareas e cepas”, un encontro que busca poñer en diálogo dous piares da economía local: o marisqueo e a acuicultura de mexillón, por unha banda, e a viticultura, pola outra. A primeira das mesas abordará a situación actual dos cultivos de bivalvos e os seus retos de futuro, coa participación de Elsa Vázquez Otero, catedrática da Universidade de Vigo; José M. Fernández Babarro, científico do IIM-CSIC; e José Manuel Parada Encisa, consultor en pesca artesanal e marisqueo. A sesión incluirá cun coloquio aberto ao público.

A segunda mesa centrarase na innovación e na sustentabilidade do viñedo, reunindo profesionais da enxeñaría agrícola, da investigación e da produción vitivinícola. Intervirán Juan Carlos Vázquez Abal, técnico da EVEGA; Tamara Canle García e Ángela Yusta Álvaro, de Paco & Lola; e Cristina Carrera, asesora técnica en viticultura. A xornada pechará ás 19:00 horas, momento no que se abrirán as casetas da festa.

A Festa do Viño 2026 contará coa participación de cinco viticultores e tres adegas do municipio, ademais de postos de artesanía e gastronomía que completarán a oferta durante toda a fin de semana. Entre as propostas culinarias destacan o Bar O Chancho, a Pulpería Selecta, Ostras Tito e a Pastelería Os Laranxos. A organización tamén programou actividades para público familiar, con inchables, obradoiros e xogos tradicionais ao longo do sábado e do domingo.

As pregoeiras desta edición serán Sobria e Serena, o dúo formado por Jazmín Abuín e Arantxa Treus, que darán inicio oficial á festa cun pregón marcado polo humor e a retranca. O sábado pola tarde celebrarase un showcooking a cargo de Chicolino Eventos, no que se elaborarán en directo dúas receitas que unen mar e viño: un pinchiño de vieira mariñada con viño de Vilaboa e un tiradito de lubina en salsa verde.

A música volverá ter un papel destacado ao longo da fin de semana. O venres actuarán as bandas de música de Bueu e de Vilaboa. O sábado, a Mekánica Rolling Band animará o mediodía e o grupo A Roda será o encargado da actuación nocturna. O domingo pechará a programación Mallou, nun concerto previsto para o mediodía.

As casetas permanecerán abertas o venres de 19:00 a 00:00 horas; o sábado de 11:00 a 17:00 e de 19:00 a 00:00 horas; e o domingo de 11:00 a 17:00 horas. As copas terán un prezo de 3 euros en concepto de depósito, que será devolto ao entregar a copa co seu tícket.

A organización destaca que esta edición pretende reforzar a identidade de Vilaboa como territorio que vive do mar e da terra, e que aposta por poñer en valor ambos sectores nun momento no que a colaboración e o apoio institucional resultan fundamentais.

O certame conta coa colaboración da Asociación de Veciños
e terá premios en tres categorías .

Vilaboa,  10 de abril de 2026. -O Concello de Vilaboa publica as bases reguladoras do Concurso dos Maios 2026, un certame aberto a rapaces e rapazas de calquera idade, podendo o xurado decidir sobre a participación doutras persoas.

As bases establecen que non haberá distincións nin prexuízos por razón de raza, relixión ou sexo, e que calquera falta de respecto verbal ou física cara ao xurado ou aos demais participantes poderá supoñer a descalificación.

O xurado estará composto polo concelleiro de Cultura, un membro da Asociación de Veciños de Figueirido e persoal técnico municipal, podendo adaptarse a súa composición en caso de ausencia dalgún membro.

A avaliación dos Maios realizarase en tres apartados: mellor letra, valorando a calidade literaria e o carácter crítico, irónico e sarcástico propio da retranca galega; mellor canto, atendendo á entoación, forza e harmonía do conxunto; e mellor Maio, puntuando os adornos e o aspecto exterior e interior, sempre partindo do respecto á forma tradicional cónica dos Maios de Vilaboa, non sendo valoradas outras formas neste apartado.

A votación será individual por cada criterio e sumaranse as puntuacións para determinar os gañadores. Os premios establecidos son: 300 euros para o primeiro, 200 para o segundo e 100 para o terceiro, podendo o xurado declarar o concurso deserto se considera que o nivel non é o axeitado. As persoas participantes deberán estar no lugar media hora antes do inicio do concurso, e a presentación dun Maio implica a aceptación íntegra das bases.

O concurso escolar de fotografía, organizado por todos os centros, remata coa exposición dos traballos no Concello e no Centro de Saúde.

Vilaboa, 27 de marzo de 2026. -O Concello de Vilaboa destaca o traballo realizado polo alumnado do CRA de Vilaboa, o CEP de Riomaior e o CPI Toural no Concurso de Fotografía organizado con motivo do Día das Artes Galegas baixo o título “Vilaboa, unha contorna sorprendente”, unha proposta educativa que buscou reforzar a conexión dos escolares co territorio a través da observación e da creación visual. A actividade enmárcase ademais na homenaxe ao fotógrafo galego José Suárez, figura central do Día das Artes Galegas deste ano, tal e como recolle o cartel da exposición titulada “Vilaboa, unha contorna sorprendente”.

Unha selección das imaxes pode visitarse xa e durante toda a vindeira semana na Casa Consistorial e no Centro de Saúde, onde se instalarán paneis expositivos que amosan a mirada da rapazada sobre o patrimonio e a paisaxe local. O cartel da mostra lembra que a fotografía se converteu nunha “ferramenta pedagóxica viva” que permite ao alumnado observar, interpretar e expresar a realidade que o rodea, ao tempo que serve para tecer lazos entre centros e poñer en valor a contorna e o patrimonio de Vilaboa.

A entrega de premios celebrarase o mércores na Casa Consistorial. Os gañadores desta edición son  Simón Novas Martínez, Enzo Pérez Martínez, ambos da escola de Barciela,  e Xian Portela Gómez, da aula de Pousada, en Infantil; Indiana Jiménez, do CPI Toural no primeiro ciclo de Primaria; Eila Barreiro (CPI Toural) e Pablo Ríos (CEP Riomaior) no segundo ciclo, e Darío González (CEP Riomaior) no terceiro ciclo; e en Secundaria, Yeray Antepazo.

O Concello trasladou os seus parabéns ao alumnado e ao profesorado pola implicación nun proxecto que combina creatividade, identidade e coñecemento do medio, e que contribúe a fortalecer o vínculo da mocidade co territorio e será o alcalde, César Poza, quien o mércores estará presente da entrega dos premios.

Máis de 350 deportistas e 50 clubs competirán durante dúas xornadas nas augas da ría, nun evento que esgota a capacidade aloxativa do municipio.

Vilaboa, 23 de marzo de 2026. -O Concello de Vilaboa  e o Club Náutico Cobres acollen esta fin de semana o I Campeonato de España de Caiac de Mar, unha cita deportiva de máximo nivel que reunirá no municipio máis de 350 deportistas pertencentes a 50 clubs de todo o país co colaboración da Federación Galega de Piragüismo. A elevada participación provocou unha ocupación total dos establecementos hoteleiros de Vilaboa, o que obrigou a varias delegacións a buscar aloxamento en concellos limítrofes, evidenciando o impacto económico e turístico que o evento xa está a xerar na comarca.

O porto de Santa Cristina de Cobres será o epicentro da competición, que se desenvolverá ao longo de dúas intensas xornadas. As probas comezarán o sábado 28 de marzo, cun programa que se estenderá de 9:00 a 15:00 horas. A xornada incluirá saídas para categorías infantís, cadetes, paracanoe, tradicional e sénior, destacando a proba de 15 quilómetros, que partirá ás 13:30 horas e que levará ás embarcacións a percorrer un dos tramos máis espectaculares da ría.

O domingo 29, a actividade retomarase ás 9:30 horas e prolongarase ata as 14:30 horas, con probas para SS2 mixto, dobre inclusivo, categorías infantís, cadetes, xuvenís, Sub23, sénior e veteranos. As entregas de medallas terán lugar ás 15:00 horas o sábado e ás 14:00 horas o domingo.

Durante toda a fin de semana, veciñanza e visitantes poderán gozar dun auténtico espectáculo deportivo vendo ás embarcacións competir e adestrar nun escenario privilexiado: as augas da ría de Vigo, cun percorrido que parte do peirao de Santa Cristina e se adentra cara Rande, un tramo que combina beleza paisaxística e esixencia técnica.

O Club Náutico Cobres, anfitrión da proba, volve demostrar a súa capacidade organizativa e o seu compromiso co impulso do piragüismo, consolidándose como un referente autonómico e nacional. O seu traballo constante, a súa aposta pola base e a súa implicación coa comunidade fixeron posible que Vilaboa acolla unha competición desta magnitude, situando ao municipio no mapa estatal do deporte náutico.

O club traslada tamén o seu agradecemento ás empresas e entidades colaboradoras, cuxo apoio é fundamental para facer realidade este evento. A súa implicación, tanto loxística como económica, permitiu reforzar a calidade organizativa da proba e contribuíu a que Vilaboa poida ofrecer unha fin de semana deportiva á altura das grandes competicións nacionais.

A dirección e o Concello chaman ás familias a apostar polas escolas unitarias, que ofrecen atención personalizada e un modelo educativo vinculado ao medio.

Vilaboa, 16 de marzo de 2026. -O Centro Rural Agrupado (CRA) de Vilaboa manterá aberto uns días máis o prazo de admisión para a etapa de Infantil (0-3 anos), ofrecendo ás familias unha nova oportunidade para coñecer e valorar a proposta educativa das escolas unitarias do municipio.

A dirección do centro explica que as escolas rurais tamén están a notar o impacto do descenso da natalidade, unha realidade que afecta a moitos concellos. Neste momento, algunhas das escolas do CRA presentan unha matrícula máis baixa do habitual, especialmente nos centros de  Figueirido e Pousada.

A directora do CRA, Conchita Pérez, lembra que as escolas unitarias ofrecen un modelo educativo moi valorado polas familias que buscan unha atención próxima e individualizada nos primeiros anos de escolarización. “Nas nosas aulas trabállase en grupos reducidos, o que permite acompañar mellor o desenvolvemento de cada neno e nena, respectando os seus ritmos e potenciando as súas capacidades”, explica.

As cinco escolas unitarias distribuídas polas diferentes parroquias de Vilaboa desenvolven un proxecto educativo ligado á contorna, no que a natureza, o xogo e a experiencia directa teñen un papel fundamental na aprendizaxe. Os proxectos parten dos recursos próximos a cada centro e favorecen unha educación activa, baseada na curiosidade, na exploración e na relación co medio.

O traballo do CRA de Vilaboa tamén foi recoñecido recentemente no III Congreso Nacional de Escolas do Medio Rural, celebrado en Teruel, onde o centro presentou o seu proxecto de transformación de espazos educativos. A proposta, centrada na BiblioCRA e no espazo CRAcreando, espertou un grande interese entre o profesorado participante.

O alcalde de Vilaboa, César Poza, anima ás familias a achegarse aos centros para coñecer de primeira man o seu funcionamento e a calidade do seu profesorado. Lembra que, aínda que este curso non existe risco inmediato, a perda continuada de matrícula podería derivar nunha futura redución de aulas no municipio. “Apostar polas escolas do propio concello é tamén unha forma de coidar das parroquias e garantir a continuidade dun modelo educativo de proximidade”, sinala.

A iniciativa achega referentes femininos da ciencia, cinco delas ligadas a Vilaboa ao alumnado do CPI O Toural e do CEP Riomaior os días 11 e 12 de marzo.

Vilaboa, 6 de marzo de 2026. –O Concello de Vilaboa completará os actos de conmemoración do Día Internacional da Muller e a Nena na Ciencia cunha actividade especial nos centros educativos do municipio. O “Paseo das Estrelas Científicas”unha proposta educativa e participativa que busca dar visibilidade ás mulleres referentes no ámbito científico e fomentar vocacións entre o alumnado. Esta iniciativa forma parte da programación da concellaría de Igualdade para o 8M, cuxo acto central será a entrega do Premio 8M ás mulleres do Entroido de Cobres, en recoñecemento ao seu labor esencial na preservación e transmisión desta tradición e que terá lugar este domingo ás 19 horas na Casa de Cultura de Riomaior.

A actividade desenvolverase nos centros CPI O Toural e CEP Riomaior, onde se instalarán estrelas no chan dos corredores dedicadas a diferentes científicas destacadas como Begoña Vila, Amparo Alonso Betanzos, Elena Vázquez Cendón, Marisol Soengas, María Victoria Lareu, Peregrina Quintela, Aida Fernández Ríos, Alicia Estévez Toranzo ou Yasmina Martínez Barciela, entre outras. O alumnado poderá percorrer este paseo descubrindo as contribucións destas investigadoras e coñecendo mellor o papel fundamental das mulleres no avance da ciencia.

O programa contará tamén coa participación de investigadoras da contorna de Vilaboa, que compartirán co alumnado a súa experiencia profesional e persoal. Entre elas estarán Zeltia López Gallego, especialista en quirópteros; Romina Fernández Poceiro, coordinadora de ensaios clínicos; Silvana Poceiro Fernández, técnica de investigación no CSIC; María Pilar Paredes Ríos, física e docente de FP; Alexandra Rodríguez Pereiras, investigadora en ecoloxía e cambio global; e Bea Lago Núñez, técnica de laboratorio na Misión Biolóxica de Galicia.

O proxecto ten como obxectivo achegar a ciencia á comunidade educativa dun xeito atractivo e accesible, ao tempo que promove referentes femininos próximos e actuais para as nenas e mozas do municipio. A iniciativa pretende tamén combater os estereotipos de xénero que historicamente afastaron a moitas mulleres das carreiras científicas e tecnolóxicas.

 Este contacto directo permitirá que as nenas e nenos coñezan de primeira man como é o traballo científico e poidan imaxinar o seu propio futuro nestes ámbitos.

O Paseo das Estrelas Científicas desenvolverase en dúas xornadas. No CEP Plurilingüe Riomaior terá lugar o 11 de marzo, con tres sesións dirixidas ao alumnado de Primaria. No CPI O Toural celebrarase o 12 de marzo, con dúas sesións destinadas ao alumnado de Primaria e ESO. En total, serán cinco encontros nos que a ciencia se achegará ás aulas a través de referentes femininos próximos e inspiradores.

O alumnado recibirá unha chapa conmemorativa que converterá a xornada nun recordo especial desta celebración da ciencia e da igualdade. Con esta proposta, a Concellalía de Igualdade reafirma o seu compromiso coa educación, coa igualdade de oportunidades e coa promoción de referentes femininos que animen ás novas xeracións a explorar o mundo científico.

A instalación abrirase cunha xornada con exhibicións, música e actividades para a rapazada coa colaboración do Club Ciclista Val do Ulló.

Vilaboa, 2 de marzo de 2026. – Vilaboa ultima os preparativos para a inauguración oficial da nova pista de pump track de Paredes, unha infraestrutura chamada a converterse nun referente deportivo e de lecer na comarca. O acto terá lugar este domingo ás 12.00 horas na contorna da Canteira, en Paredes, e supón a apertura dun espazo pensado para a práctica segura e divertida de modalidades como bicicleta, monopatín, patíns ou patinete, ademais de servir como punto de encontro para a mocidade e as familias.

A xornada inaugural contará coa presenza de dúas figuras destacadas do pump track galego: Paula Rodríguez, campiona de Galicia e do Open de España PT 2025, e Iván García, campión de Galicia e do Open de Galicia PT 2025. Ambos realizarán exhibicións que permitirán ver a pista en pleno rendemento e mostrarán o potencial desta disciplina, cada vez máis estendida entre a mocidade. Ademais, haberá música, demostracións en directo e un obradoiro de aprendizaxe dirixido aos nenos e nenas de Vilaboa, que poderán iniciarse na técnica acompañados por profesionais e polo Club Ciclista Val do Ulló.

A nova pump track representa un paso máis na aposta de Vilaboa por crear espazos públicos de calidade, fomentar hábitos saudables e ofrecer alternativas de ocio ao aire libre. A súa localización en Paredes, nunha zona xa consolidada como punto de encontro veciñal, reforza o carácter integrador da instalación e contribúe a dinamizar a vida social e deportiva do municipio.

A obra, impulsada polo Concello de Vilaboa coa colaboración da Deputación de Pontevedra supuxo un investimento significativo de arredor dos 163.325 euros  nunha pista distribuída nun circuíto continuo de ondas, peraltes e trazados enlazados que permiten rodar sen pedalear, aproveitando a inercia e o movemento corporal. A pista está deseñada para todos os niveis, desde iniciación ata usuarios avanzados, e cumpre cos estándares actuais de seguridade e accesibilidade.

O Concello anima a toda a veciñanza a achegarse este domingo, con bicicleta, monopatín, patíns ou patinete, para celebrar a posta en marcha dunha infraestrutura que chega para quedar e que aspira a converterse nun símbolo da vitalidade e do dinamismo de Vilaboa.

O Premio, que se entrega o domingo en Riomaior, recoñece a labor de costureiras, veteranas, músicas e xunta directiva da Asociación Cultural Cobres.

Vilaboa, 1 de marzode 2026. –  O Premio 8M do Concello de Vilaboa recae este ano nas costureiras, no grupo de veteranas do Entroido de Cobres e nas mulleres da xunta directiva da Asociación Cultural Cobres, tres piares que sosteñen unha tradición única en Galicia e que, desde ámbitos distintos, comparten unha mesma misión: transmitir o amor profundo polo Entroido de xeración en xeración. A Casa da Cultura de Riomaior acollerá ás 19:00 horas o acto especial de homenaxe, unha celebración que reunirá música, memoria e recoñecemento colectivo. O programa inclúe a actuación musical das Pandereteiras Tudoten de Soutomaior, a proxección dunha vídeo reportaxe dedicada ás protagonistas e a entrega do Premio 8M Vilaboa a un total de 22 mulleres, nun encontro promovido pola Concellería de Igualdade de Vilaboa co apoio do Ministerio de Igualdade e do Pacto de Estado contra a Violencia de Xénero.

Tanto para Carmen Gallego, edil de Igualdade, como para César Poza, alcalde de Vilaboa, este premio é un recoñecemento público ao traballo feminino por manter viva esta tradición singular. “Porque Cobres é o berce dun Entroido que define a identidade de Vilaboa e que hoxe forma parte do patrimonio inmaterial de Galicia. E son de novo as mulleres, as que foron capaces de manter este legado vivo. Un legado de valor incalculable que temos a responsabilidade de coidar e protexer para quen nos preceda”, aseguran. Este premio é, sobre todo, un “xesto de gratitude; unha maneira de dicirlles que valoramos o seu traballo e que a súa dedicación sostén unha tradición que nos fai únicas”.

As costureiras: o oficio que converte a tradición en arte

As costureiras son a man invisible que sostén o esplendor do Entroido, artesás capaces de transformar materiais humildes en pezas que abraian. No silencio das súas casas, entre teas que se estenden, puntillas que se escollen con mimo e centos de abelorios cosidos un a un, dan vida a traxes que requiren unha precisión extrema e unha dedicación que non se pode medir en horas. O seu labor abrangue tamén a creación dos vistosos sombreiros, auténticas arquitecturas de equilibrio e detalle, onde cada flor, cada pluma e cada brillo se coloca coa mesma paciencia que se herda de xeración en xeración. En cada madama e en cada galán vai a súa mirada, o seu coidado e a súa memoria. Grazas a elas, o Entroido non só se ve: respírase, emociona e permanece. Mari Carmen Docampo Solla, Carmen Cortegoso González, Aurita Palmeiro e María del Carmen Poceiro Buceta son parte esencial deste legado vivo, mulleres que co seu talento manteñen aceso o fío que une tradición e arte.

As veteranas: a memoria que non se deixa esquecer

As veteranas representan a voz da experiencia, o recordo vivo de como se celebraba o Entroido cando non había máis recursos ca ilusión. Foron quen de manter o costume en tempos difíciles, de ensinar pasos, melodías e rituais, de lembrar como se vestía e como se vivía a festa. Son o fío que une o que fomos co que somos, e sen elas o Entroido de Cobres non tería a súa alma.

Durante décadas, foron numerosas as mozas de Cobres que quedaron con ganas de Entroido. A realidade económica tamén pesaba: un traxe de madama, entre sombreiro, peitoril e prendas, podía supoñer un custo inasumíbel para moitas familias

Foi nese contexto de silencios e renuncias onde, hai catorce anos, xurdiron as Veteranas do Entroido de Cobres, un grupo maioritariamente feminino —aínda que con algunha presenza masculina— que decidiu recuperar o que lles fora negado. Ensaiaron, investigaron melodías antigas e subiron ao escenario de Riomaior os días grandes do Entroido, aqueles nos que máis xente se achega á festa. As Veteranas escolleron unha vestimenta discreta, inspirada nas antigas aldeás: sen sombreiro, sen peitoril e con poucas xoias, reivindicando así unha forma de participar que non dependa do luxo nin do custo económico. Para moitas delas, o grupo converteuse nunha segunda oportunidade: mulleres de trinta e poucos anos comparten escenario con outras que superan os sesenta, unidas pola mesma paixón e pola vontade de manter viva a tradición. Hoxe son símbolo de resistencia cultural e de orgullo colectivo.

A esta labor súmase o das mulleres que forman parte do grupo de música e da asociación Aires de Cobres, que sostén o Entroido desde o son, a memoria e a transmisión oral. Por esta labor recibirán o recoñecemento social  María Isabel Fernández Poceiro, Carmen Castro González “Cachito”, Clara María Fernández Casal, Martiña Ferreira Novio, Verónica Moledo Fernández, Beatriz del Río Couso, María José Casal Barros, María Luisa Poceiro Camiña, Inés Collazo Corbacho, Patricia Poceiro del Río, Alicia Meira Ríos, Rosana Mayan Pazos e María de los Ángeles Framil García, mulleres que representan distintas xeracións e historias persoais, unidas pola mesma paixón por manter viva a tradición.

A xunta directiva: o traballo silencioso que fai posible o imposible

A xunta directiva da Asociación Cultural Cobres merece un recoñecemento especial polo seu labor constante, discreto e imprescindible e no 8M será para as súas integrantes femininas. Son quen sosteñen a organización, a transmisión e a protección desta tradición centenaria, asumindo tarefas que non sempre se ven pero que fan posible que o Entroido continúe vivo, ordenado e forte ano tras ano. Coordinan grupos, recuperan documentación, impulsan proxectos, acompañan ás novas xeracións e manteñen o equilibrio entre o respecto polo legado e a adaptación aos tempos actuais.

Organizar as saídas do Entroido, un labor cada vez máis complexo porque a presenza das madamas e galáns é demandada en máis lugares e en máis actos ca nunca. Xestionan calendarios, compromisos, desprazamentos e necesidades loxísticas que requiren unha coordinación fina e constante.

A isto súmase unha das tarefas máis difíciles e menos visibles: facer auténtica enxeñería financeira para conseguir os recursos necesarios que permitan manter viva a festa. Buscar apoios, administrar orzamentos axustados, garantir materiais, vestimenta, música, transporte e infraestrutura… todo iso sen perder a esencia nin comprometer a continuidade da tradición. Coa mirada sempre posta nos catro días completos de festa, nos que todo debe funcionar con precisión para que o público só vexa beleza, música e tradición, nunca o esforzo titánico que hai detrás.

Por iso o Concello de Vilaboa recoñecerá a Jessica Lameiro Cortegoso, Sara Barros González, Lidia Peleteiro Arosa e Tamara Pazos Mariño, catro mulleres que representan compromiso, responsabilidade e unha dedicación que vai moito máis alá do visible.

A súa labor confirma unha realidade xa incuestionable: o Entroido de Cobres avanza grazas ás mans, ás voces e á entrega das mulleres que o coidan desde dentro, garantindo que cada danza, cada melodía e cada sombreiro continúen a formar parte da identidade colectiva de Vilaboa.

O CRA de Vilaboa coordina esta iniciativa que une a catro centros escolares de distintas comunidades autónomas.

Vilaboa, 25de febreiro de 2026. – O Concello de Vilaboa celebrou hoxe unha recepción  na sede do CRA do Toural para dar a benvida ao profesorado participante no Proyecto de Agrupación Escolar “Raíces del Futuro: Patrimonio Natural y Cultural a través del STEAM”, unha iniciativa promovida polo Ministerio de Educación, Formación Profesional e Deportes que une centros de distintas comunidades autónomas arredor da innovación educativa e da aprendizaxe conectada co territorio.

O alcalde, César Poza, acompañado pola directora do CRA de Vilaboa, Conchita Pérez, recibiu ás docentes que estes días visitan o municipio no marco deste intercambio profesional. Participaron na xornada María del Carmen de la Cruz, do CEIP Casillas del Ángel (Puerto del Rosario, Fuerteventura); María Pérez Núñez, do CEIP Ramón Linacero (Alalpardo, Madrid), acompañada de tres mestras do centro; e Cándida María Vicente Pérez, do CEIP Máximo Cruz Rebosa (Piornal, Cáceres).

Durante o encontro, o Concello agasallou ás visitantes cunha placa do Entroido de Vilaboa e con produtos elaborados por Cabo de Peñas, un xesto que quixo poñer en valor dúas das señas de identidade do municipio: o seu patrimonio cultural e a súa tradición vinculada ao mar.

O CRA de Vilaboa exerce como centro coordinador deste proxecto estatal a desenvolver en dous anos, no que participan escolas rurais de diferentes comunidades autónomas españolas. Todos eles comparten unha aposta firme por unha educación próxima, personalizada e conectada co entorno, baseada no traballo por proxectos, no enfoque STEAM e na posta en valor da identidade local como motor da aprendizaxe.

“Raíces del Futuro” busca fortalecer a cooperación entre centros e promover unha mirada educativa que recoñeza o patrimonio natural e cultural como parte esencial da formación do alumnado, unha visión coa que Vilaboa se identifica plenamente eque no caso do CRA de Vilaboa centrará no Entroido de Cobres este curso e no medio natural no vindeiro.

O novo persoal técnico céntrase no control da xestión da biomasa para aumentar a seguridade nos núcleos máis expostos.

Vilaboa, 18 de febreiro de 2026. – O Concello de Vilaboa vén de reforzar o seu Departamento de Medio Ambiente coa incorporación dun técnico interino e dun contrato de formación dun ano de duración, co obxectivo prioritario de traballar na xestión da biomasa con carácter preventivo. Con esta medida, o goberno local dá un paso decisivo para mellorar a seguridade da veciñanza e reducir o risco de incendios forestais nos núcleos máis vulnerables do municipio.

O novo equipo, formado por Miguel Vilas Aguete e André Barciela, centrará o seu labor inicial nos lugares de Sobreira, Vilar e A Graña, tres zonas consideradas prioritarias pola súa elevada exposición tanto a lumes como ás consecuencias dos últimos temporais. O traballo deste equipo está directamente coordinado polo alcalde, César Poza, quen subliña que “a seguridade xeral da veciñanza está por riba da desidia dalgúns propietarios que manteñen especies pirófitas como pinos ou eucaliptos demasiado preto das estradas”.

Actualización de expedientes e inicio de sancións

Nestes momentos, o equipo de Medio Ambiente está a actualizar centos de expedientes abertos por incidencias relacionadas coa necesidade de cortar especies pirófitas en parcelas próximas a viais públicos. Cada expediente atópase nun punto distinto de tramitación, polo que o Concello está a revisar caso por caso para garantir unha actuación rigorosa.

Tras as comunicacións previas aos propietarios, o Concello iniciará o procedemento sancionador para aqueles que incumpran a normativa vixente. “Temos claro que imos actuar con contundencia”, afirma o alcalde. “Vilaboa non pode permitirse repetir a inseguridade vivida o pasado verán nin permitir que un temporal incremente a súa perigosidade porque os accesos están rodeados de especies que non deberían estar aí”.

Unha cuestión de seguridade, non de política

César Poza insiste en que este reforzo e as actuacións previstas responden exclusivamente a criterios técnicos e de protección cidadá. “Isto non é unha cuestión política, é unha cuestión de seguridade da veciñanza. O Concello implicarase a fondo na prevención para evitar, na medida do posible, que un lume ou un temporal volvan poñer en risco a vida das persoas”.

Coa incorporación deste novo equipo e coa folla de ruta marcada, o Concello de Vilaboa dá un paso firme cara a unha xestión máis eficaz da biomasa e unha maior protección dos seus núcleos de poboación.

Madamas e galáns encaran catro días de festa tras semanas de promoción en centros educativos e sociais de Vilaboa e de toda a provincia.

Vilaboa, 13 de febreiro de 2026. -Vilaboa prepárase para vivir desde mañá sábado catro días intensos de celebración co inicio do Entroido de Cobres, unha das citas máis singulares e recoñecidas do entroido galego. Manterase íntegro o calendario de actuacións, malia que o tempo poida condicionar puntualmente os tradicionais bailes polos barrios a carpa instalada en Riomaior dará cabida á festa, coas danzas de madamas de galáns e coas verbenas nocturnas.

O programa dará comezo mañán sábado co percorrido matinal das Madamas e Galáns, seguido da chegada á carpa e da primeira gran festa nocturna, que abrirá oficialmente unha fin de semana marcada pola música, o baile e a tradición. A gran festa de apertura contará cunha verbena amenizada pola Orquesta Kubo e o trío Tic Tac.

Durante esta semana previa ao inicio oficial, Madamas e Galáns atenderon numerosas peticións de centros escolares e sociais, tanto de Vilaboa como doutros concellos da provincia. Desprazáronse ataviados cos seus traxes tradicionais para achegar esta tradición centenaria á cidadanía, espertando curiosidade e fomentando a participación en vivo nun dos entroidos máis emblemáticos de Galicia.

Un dos momentos máis emotivos tivo lugar este xoves no Centro Social e de Maiores de Vilaboa (CESMAV), onde tres madamas e un galán compartiron a tarde coas persoas usuarias do centro. A visita evocou lembranzas e emocións entre os asistentes, que reviviron historias ligadas ao Entroido de Cobres.

Entre elas destacou María Lino, que acompaña por Ariana Gondar, Alexandra Corredoira e Jacobo Lusquiños, relatou a súa volta ao entroido despois de 28 anos sen bailar. Faino acompañada do seu home e dunha irmá que tamén recupera a tradición tras 13 anos afastada. María amosou con orgullo un sombreiro con máis de 50 anos de historia, elaborado pola súa bisavoa para a súa avoa, unha peza familiar que simboliza a transmisión xeracional deste patrimonio inmaterial.

Na visita ao CESMAV, Madamas e Galáns foron recibidos pola concelleira de Servizos Sociais, María Canosa, e polo alcalde, César Poza, e quen destacou a esperanza de que a declaración de Festa de Interese Turístico Nacional chegue proximamente. Ambos subliñaron que este recoñecemento suporía un paso máis na protección e valorización dunha tradición sostida grazas á implicación e ao cariño da veciñanza, especialmente da parroquia de Cobres.

O Entroido de Cobres inicia así unha nova edición mantendo viva a súa esencia e reafirmando o seu papel como un dos grandes referentes culturais do país.

A choiva presenta o seus respectos ao entroido tradicional máis importante da provincia e permite desfrutar desta tradición fondamente arraigada.

Vilaboa, 8 de febreiro de 2026. -A choiva, coma se tamén quixese render homenaxe ao Entroido de Cobres, respectou a presentación celebrada esta mañán en Santa Marta (Bértola), Figueirido e Postemirón (Vilaboa) e que continuará pola tarde en Paredes e As Salinas. O día abriuse como un agasallo visual para que a veciñanza recibira á comitiva entre sorrisos e esa emoción que só esperta unha tradición tan fondamente arraigada.

No percorrido desvelouse a gran novidade desta edición: o baile “Riomaior”, unha peza que nace para honrar o lugar que cada ano acolle a carpa do Entroido e que simboliza, con elegancia e movemento, a forza colectiva desta celebración centenaria. O público, entregado desde o primeiro compás, desfrutou dunha coreografía sorprendente pola súa frescura e pola súa capacidade para dialogar coa tradición sen perder autenticidade.

A posta en escena das madamas e dos galáns —auténticos emblemas dun Entroido singular pola ausencia total de máscaras, pola vistosidade dos seus sombreiros e polo colorido exuberante das vestimentas— converteu cada parada nun pequeno espectáculo. Acompañados polo grupo de gaitas Aires de Cobres, que encheu o aire de melodías recoñecibles e vibrantes, o conxunto transformouse nun cadro vivo capaz de emocionar a quen tivo a fortuna de presenciar o momento.

Con este bagaxe ás costas, o regreso ás parroquias de Vilaboa converteuse nun acto de celebración e recoñecemento. Este domingo, a comitiva iniciou o seu percorrido ás 11:00 horas na Capela de Santa Marta de Bértola, continuou ás 12:00 horas en Figueirido e ás 13:00 horas no Campo da festa de Postemirón.  Cada parada converteuse nun encontro directo coa xente, un xeito de compartir ilusión, de anunciar que o Entroido xa estaba ás portas e de lembrar que esta tradición segue viva grazas ao compromiso das familias, da agrupación cultural Cobres e de todas as persoas que, ano tras ano, manteñen acesa unha das xoias do patrimonio inmaterial galego.

O Entroido de Cobres demostrou, unha vez máis, que non é só un espectáculo visual, senón unha expresión artística e comunitaria que fala de identidade, de memoria e de futuro. E Vilaboa, que xa coñece ben ese latexo, sentiu este domingo a emoción profunda que converte o seu Entroido nun dos máis admirados dentro e fóra de Galicia.

A inspección, guiada polo alcalde de Vilaboa, responde ao compromiso adquirido polo conselleiro de Sanidade na reunión de xaneiro con César Poza.

Vilaboa, 6 de febreiro de 2026. –

O Concello de Vilaboa reclama unha intervención urxente e integral no centro de saúde do Toural tras a inspección realizada hoxe por persoal técnico da área sanitaria de Pontevedra, acompañado polo alcalde, César Poza. A visita permitiu constatar, unha vez máis, o avanzado estado de deterioro dunha infraestrutura esencial para a veciñanza e que leva 27 anos sen unha actuación de subsanación dunhas deficiencias evidenciadas hai xa anos.

Durante o percorrido polo interior e exterior do edificio, o persoal sanitario detallou aos técnicos as numerosas deficiencias que afectan ao funcionamento diario das consultas. As humidades e filtracións de auga son unha constante en diferentes espazos, con paredes desconchadas, manchas de moho e pasillos nos que as madeiras presentan un inchamento evidente. Esta situación non só deteriora a imaxe do servizo, senón que compromete o confort e a seguridade das persoas usuarias e do propio persoal sanitario.

Accesibilidade deficiente no acceso ao centro

O alcalde trasladou aos técnicos unha das principais demandas do Concello: a mellora urxente dos dous accesos ao centro. No acceso principal, César Poza reclamou a instalación dunha marquesiña pechada que garanta unha entrada segura e accesible, especialmente para persoas en cadeira de rodas ou con mobilidade reducida. A porta actual non ofrece protección suficiente nos días de chuvia, dificultando a entrada e saída das persoas usuarias.

A entrada traseira presenta un estado igualmente preocupante: o teito acristalado, deteriorado polas filtracións, provoca un acceso en condicións deplorables que require unha reparación inmediata.

Os técnicos do Sergas tomaron nota de todas as deficiencias detectadas e comprometéronse a elaborar o correspondente orzamento para acometer as obras necesarias. O Concello agarda que este compromiso se traduza nunha actuación áxil e efectiva, á altura da gravidade da situación.

A visita de hoxe responde ao compromiso adquirido polo conselleiro de Sanidade nunha reunión mantida co alcalde o 19 de xaneiro en Santiago. Nese encontro, César Poza trasladoulle a urxencia de intervir nunha infraestrutura que, case tres décadas despois da súa inauguración, continúa arrastrando problemas estruturais sen que se lle dera solución.

O Concello de Vilaboa insiste en que a veciñanza merece un centro de saúde digno, seguro e en condicións óptimas para prestar un servizo esencial. O goberno municipal esixe ao Sergas que actúe con responsabilidade e dilixencia para garantir unha atención sanitaria de calidade, acorde co que merece a cidadanía.

Madamas e Galáns protagonizarán unha edición que reforzará o seu carácter único en Galicia.

Vilaboa, 23 xaneiro de 2026. – A Asociación Cultural Cobres ultimou o programa oficial do Entroido de Cobres 2026, unha das tradicións máis singulares do país e un referente cultural. A celebración, marcada pola elegancia das Madamas e Galáns e por un fondo arraigamento comunitario, desenvolverase entre o 14 e o 17 de febreiro, combinando percorridos tradicionais, música, gastronomía e os rituais máis característicos desta festa centenaria.

A programación abrirase o sábado 14, cando o entroido percorrerá os barrios desde as 10:00 ata as 19:00 horas, momento no que está prevista a chegada á carpa. Pola noite, ás 22:00 horas, terá lugar a Gran Festa de Apertura, que contará coas actuacións da Orquestra Kubo e do Trío Tic Tac, marcando o inicio oficial dunha fin de semana de intensa actividade festiva.

O domingo 15 manterá o esquema tradicional, cun novo percorrido polas parroquias entre as 10:00 e as 19:00 horas e a posterior chegada á carpa. A xornada culminará ás 22:00 horas cunha festa amenizada por Son das Tabernas, que ofrecerá un repertorio pensado para o baile e a participación do público.

O luns 16, coñecido como o Luns de Maghachos, volverá encher as rúas co percorrido matinal e vespertino, que se prolongará ata as 19:00 horas. A partir das 21:30 horas, a carpa converterase no epicentro da celebración cunha noite de música e humor protagonizada pola Orquestra Magos e o Trío La Noche, nunha das citas máis multitudinarias e esperadas do Entroido.

O martes 17, día grande da festa, comezará cun percorrido reducido ata as 13:00 horas, seguido dunha sesión vermú amenizada polo Dúo Los Dinámicos, acompañada de comida popular con polbo, churrasco e outras propostas tradicionais. Pola tarde, a partir das 16:30 horas, desenvolveranse os rituais máis emblemáticos do Entroido de Cobres, coa participación de Isi da TVG e Marci Varela e coa celebración do Galo no Río, Galo na Vara, Corrida, Predicador e Queima do Galo. A Fanfarria Furruxa acompañará a festa trala Queima, e o DJ Gabryd será o encargado de poñer o broche final a unha edición que promete ser inesquecible.

A organización anima a veciñanza e visitantes a seguir o percorrido e todas as novidades a través das redes sociais oficiais e da web entroidodecobres.com, reforzando así a difusión dunha festa que cada ano atrae a centos de persoas e que continúa a ser un símbolo de identidade, orgullo e tradición para Vilaboa.

Belén Arosa, autora de Postemirón, compartiu coa comunidade educativa un emotivo acto no que o alumnado protagonizou lecturas do poemario.

Vilaboa, 22 xaneiro de 2026. – O colexio de Riomaior acolleu unha xornada cargada de emoción e poesía coa presentación do libro “Sueños de Juventud”, da escritora local Belén Arosa Herrero. Nun acto que mesturou literatura e pedagoxía, os escolares converteronse en auténticos protagonistas ao dar lectura tanto aos poemas da autora de Postemirón como a creacións propias que evidenciaron a súa capacidade creativa.

A directora do centro, Carmen Negro, foi a encargada de presentar e conducir o acto, no que comezou agradecendo a Belén Arosa a elección do colexio –onde xa estudaron dous dos seus tres fillos– para acoller a presentación desta recopilación poética. Negro explicou que a dirección do centro está a utilizar esta obra como ferramenta educativa para animar á rapazada a empregar a poesía como vía de expresión das súas emocións.

Precisamente, a necesidade de expresar sentimentos foi unha das motivacións que a autora recoñeceu atopar na poesía. “É un xeito de sacar todas as emocións e sentimentos que levo dentro, tanto nos bos como nos malos momentos. Cada poema convértese nun volcado emocional”, sinalou Belén Arosa durante a súa intervención.

Mediante un formato dinámico no que o alumnado prantexou unha batería de preguntas á autora, os asistentes adentráronse un pouco máis na profundidade dunha obra que recolle poemas escritos en diferentes etapas da vida da autora e que encontrou inspiración no seu rico mundo interior pero tamén en autores como Rosalía de Castro, sobre todo nas súas loubanzas á terra.

A escritora estivo arroupada polo alcalde de Vilaboa, César Poza; polas concelleiras Carmen Gallego e María Canosa; pola directora do CRA de Vilaboa, Conchita González, e por toda a súa familia, que lle amosou o seu respaldo neste momento especial.

Carmen Gallego aproveitou a súa felicitación á autora para poñer de relevo “a importancia de que as mulleres de zonas rurais escriban e cumpran os seus soños” e animou “a todas as nenas que teñen vocación a que se atrevan a escribir”.

Pola súa banda, o alcalde César Poza, que tamén deu lectura a un poema, felicitou a Belén Arosa e animouna a seguir neste proceso creativo que a converte en “fonte de inspiración” para a veciñanza. Ademais, dirixiuse ao alumnado presente: “Anímovos a escribir porque tamén vos pode axudar a manifestar as cousas que sentides e axudarvos a medrar e ser mellores persoas”.

O acto supuxo unha xornada de encontro entre a literatura e a educación, demostrando como a poesía pode ser unha ferramenta de crecemento persoal e expresión emocional para todas as idades.

Belén Arosa, autora de Postemirón, compartiu coa comunidade educativa un emotivo acto no que o alumnado protagonizou lecturas do poemario.

Vilaboa, 22 xaneiro de 2026. – O colexio de Riomaior acolleu unha xornada cargada de emoción e poesía coa presentación do libro “Sueños de Juventud”, da escritora local Belén Arosa Herrero. Nun acto que mesturou literatura e pedagoxía, os escolares converteronse en auténticos protagonistas ao dar lectura tanto aos poemas da autora de Postemirón como a creacións propias que evidenciaron a súa capacidade creativa.

A directora do centro, Carmen Negro, foi a encargada de presentar e conducir o acto, no que comezou agradecendo a Belén Arosa a elección do colexio –onde xa estudaron dous dos seus tres fillos– para acoller a presentación desta recopilación poética. Negro explicou que a dirección do centro está a utilizar esta obra como ferramenta educativa para animar á rapazada a empregar a poesía como vía de expresión das súas emocións.

Precisamente, a necesidade de expresar sentimentos foi unha das motivacións que a autora recoñeceu atopar na poesía. “É un xeito de sacar todas as emocións e sentimentos que levo dentro, tanto nos bos como nos malos momentos. Cada poema convértese nun volcado emocional”, sinalou Belén Arosa durante a súa intervención.

Mediante un formato dinámico no que o alumnado prantexou unha batería de preguntas á autora, os asistentes adentráronse un pouco máis na profundidade dunha obra que recolle poemas escritos en diferentes etapas da vida da autora e que encontrou inspiración no seu rico mundo interior pero tamén en autores como Rosalía de Castro, sobre todo nas súas loubanzas á terra.

A escritora estivo arroupada polo alcalde de Vilaboa, César Poza; polas concelleiras Carmen Gallego e María Canosa; pola directora do CRA de Vilaboa, Conchita González, e por toda a súa familia, que lle amosou o seu respaldo neste momento especial.

Carmen Gallego aproveitou a súa felicitación á autora para poñer de relevo “a importancia de que as mulleres de zonas rurais escriban e cumpran os seus soños” e animou “a todas as nenas que teñen vocación a que se atrevan a escribir”.

Pola súa banda, o alcalde César Poza, que tamén deu lectura a un poema, felicitou a Belén Arosa e animouna a seguir neste proceso creativo que a converte en “fonte de inspiración” para a veciñanza. Ademais, dirixiuse ao alumnado presente: “Anímovos a escribir porque tamén vos pode axudar a manifestar as cousas que sentides e axudarvos a medrar e ser mellores persoas”.

O acto supuxo unha xornada de encontro entre a literatura e a educación, demostrando como a poesía pode ser unha ferramenta de crecemento persoal e expresión emocional para todas as idades.

O goberno local busca financiamento no Plan +Provincia para tres intervencións que reforzan o patrimonio, o litoral e a mobilidade en puntos clave do municipio.

Vilaboa, 19 xaneiro de 2026. – O Concello de Vilaboa vén de presentar ao Plan +Provincia da Deputación de Pontevedra a primeira fase de dous proxectos de grande relevancia para o municipio, xunto coa segunda fase da humanización do barrio de Barciela que precisa dun investimento de 77.000 euros. Con esta proposta, o goberno local continúa avanzando na mellora dos espazos públicos, na recuperación do patrimonio e na creación de contornas máis accesibles e sostibles para a veciñanza.

As actuacións previstas en Barciela teñen como finalidade reforzar a seguridade viaria da zona dentro do proxecto de humanización deste entorno. Para iso, ampliarase a sección da calzada sempre que sexa posible, aproveitando os sobreanchos existentes, e renovarase o firme mediante a aplicación dunha nova capa de aglomerado en quente de 5 centímetros no vial principal, así como dun pavimento de formigón no vial secundario. Tamén se optimizará a recollida de augas pluviais coa instalación de reixas de drenaxe transversal e medios canos para o drenaxe lonxitudinal. Finalmente, completarase a intervención coa execución da sinalización horizontal e vertical en todo o ámbito da obra e coa instalación de redutores de velocidade tipo “lomo de asno”, reforzando así a seguridade para vehículos e peóns.

Un dos proxectos máis destacados é o acondicionamento do borde litoral das Salinas de Ulló e Paredes, que nas súas tres fases suma un orzamento global de 439.621 euros. A intervención concíbese como unha transformación integral do camiño litoral, que pasará a ser un espazo de clara prioridade peonil e plenamente integrado na súa contorna natural. Para iso prevese a retirada do bordillo actual, que se recolocará na marxe esquerda para ordenar a calzada, así como a eliminación do pavimento de aglomerado, que será substituído por unha plataforma única de adoquíns de granito máis accesible e respectuosa coa paisaxe. A actuación inclúe tamén a renovación completa da varanda existente, que será substituída por un modelo de aceiro galvanizado con barrotes verticais, deseñado para resistir a salinidade e cumprir a normativa vixente en materia de accesibilidade e seguridade.

No Paseo do Muíño de Mareas de Ulló, o proxecto contempla igualmente a substitución da varanda deteriorada por un novo elemento de aceiro galvanizado, garantindo unha maior durabilidade e unha mellor integración estética nun dos espazos máis visitados do municipio. Pola súa banda, na Pista da Cerca prevese unha mellora diferenciada segundo o uso de cada tramo. No primeiro, renovarase a superficie mediante xabre estabilizado. No segundo tramo, onde o tráfico é máis intenso debido ao acceso a vivendas e ao embarcadoiro, substituirase o aglomerado por un pavimento de formigón con acabado desactivado en cor ocre, máis acorde coa paisaxe litoral.

O proxecto estrutúrase en tres fases independentes, cada unha delas considerada unha obra completa segundo a Lei 9/2017 de contratos do sector público. A primeira fase, para a que solicitou financiación a través do Plan +Provincia,  abrangue a metade inicial da intervención no camiño das Salinas de Ulló.

Xunto a este proxecto, o Concello tamén presenta ao Plan +Provincia a primeira fase da humanización do núcleo tradicional do Alcouce, unha intervención na que o goberno local traballa desde 2024 e que supón un investimento global que supera os 457.909 euros. Trátase dunha actuación orientada á recuperación dun espazo de alto valor patrimonial, coa mellora da mobilidade peonil, da calidade urbana e da identidade histórica dun dos núcleos máis singulares de Vilaboa.

Co conxunto destas propostas, Vilaboa reafirma o seu compromiso coa mellora continua dos espazos públicos, a posta en valor do patrimonio natural e cultural e a creación de contornas máis accesibles, seguras e sostibles para toda a cidadanía.

 O desbloqueo da situación actual pasa polo respaldo da Xunta de Galicia.

Vilaboa, 7 xaneiro de 2026. – O alcalde de Vilaboa, César Poza, e a concelleira de Promoción Económica, Carmen Gallego, mantiveron hoxe mércores en Madrid unha reunión co secretario de Estado de Medio Ambiente, Hugo Morán, para explorar vías de solución á situación dos núcleos costeiros do municipio afectados pola aplicación da Lei de Costas.

 A xuntanza enmárcase nas numerosas xestións realizadas polo goberno local nos últimos tempos, tanto a nivel municipal como autonómico, que permitiron poñer enriba da mesa varias opcións técnicas e administrativas que poderían contribuír a desbloquear a situación actual.

Porén, todas estas alternativas requiren do respaldo da Xunta de Galicia para poder avanzar con garantías. Por este motivo, o Concello solicitará unha nova reunión coa directora xeral de Urbanismo da Xunta, co obxectivo de replantexar a situación e reforzar a cooperación entre administracións.

O goberno municipal reafirma o seu compromiso de seguir traballando con diálogo, rigor e lealdade institucional para acadar unha solución definitiva para o litoral de Vilaboa e garantir a seguridade xurídica da veciñanza.

A ANPA reclamou en outubro o reversión dos recortes aplicados ao centro.

Vilaboa, 25 decembro de 2025. –Papá Noel percorreu na tarde de onte as parroquias de Vilaboa e a súa parada en Figueirido converteuse nun momento perfecto para que a Asociación de Veciños de Figueirido e a ANPA do CEIP do Toural lle fixeran chegar unha petición moi especial: a recuperación da especialista de Audición e Linguaxe a tempo completo para o centro educativo; unha reivindicación que contou co apoio do alcalde de Vilaboa, César Poza.

A comunidade escolar leva desde outubro advertindo de que, tras os recortes aplicados, a atención especializada quedou reducida aos casos máis graves, deixando sen cobertura a numerosos nenos e nenas con dificultades de linguaxe que ata agora recibían apoio profesional. Esta situación está a obrigar a moitas familias a recorrer a servizos privados de logopedia, cun custo económico inasumible para numerosos fogares e cun impacto directo no incremento das desigualdades educativas. A ANPA leva semanas amosando a súa preocupación e reclamando unha solución inmediata.

A veciñanza de Figueirido non perde a esperanza e confía na “mediación” de Papá Noel. Lembran que o ano pasado xa aproveitaron a súa visita para amosarlle o potencial das antigas vías do ferrocarril, chamadas a formar parte da futura Vía Verde proxectada polo ADIF. Aquel percorrido en vagoneta, cargado de ilusión, precedeu un ano no que o proxecto —paralizado durante máis dunha década— experimentou un avance inesperado e case máxico. En Vilaboa agárdase agora que a historia se repita.

Durante o seu percorrido por Santa Cristina e Cabadachán, Papá Noel viviu tamén un momento especialmente divertido na Carretera Vella, en Paredes, onde o Grinch fixo acto de presenza para, finalmente, sumarse ao reparto de caramelos e á festa da veciñanza.