A I Xuntanza “Memoria Viva” reunirá o 25 de outubro Á veciñanza maior nun encontro de afecto, convivencia e celebración .

Vilaboa, 3  de octubro de 2026. -Vilaboa prepara unha celebración profundamente simbólica e cargada de afecto: a 1ª Xuntanza dos Nosos Maiores “Memoria Viva”, unha iniciativa que quere poñer no centro ás persoas que, co seu esforzo, sabedoría e dedicación, construíron a identidade colectiva do municipio. O Concello concibe esta xornada como un agradecemento público e sentido á xeración que mantén acesa a memoria comunitaria e que continúa a ser un piar fundamental na vida social de Vilaboa.

A cita terá lugar o 25 de outubro, entre as 13:00 e as 19:00 horas, no Parque de Riomaior, fronte á Casa de Cultura, un espazo escollido pola súa comodidade e pola súa capacidade para acoller unha celebración pensada para compartir, reencontrarse e gozar en compañía e será aí onde o Concello instale unha carpa acondicionada para acoller este evento.

A programación inclúe comida, homenaxe, música e baile, nun ambiente festivo que busca recuperar o espírito das reunións de antes, esas nas que a comunidade se recoñecía, se escoitaba e se celebraba. A xornada está dirixida ás persoas maiores de 65 anos e tamén ás persoas pensionistas menores de 65 anos empadroadas en Vilaboa, que poderán participar de maneira gratuita previa inscrición.

As inscricións estarán abertas do 6 ao 16 de outubro, cun máximo de 300 prazas, que se cubrirán por orde de solicitude. O Concello anima á veciñanza a participar nun encontro que aspira a converterse nunha cita anual, un espazo de afecto e recoñecemento colectivo onde celebrar a vida compartida.

Con esta primeira edición de “Memoria Viva”, Vilaboa reafirma o seu compromiso coa terceira idade, recoñecendo o valor das súas historias, das súas vivencias e do seu papel esencial na construción dunha comunidade forte, orgullosa e unida.

O 94 % das familias expresa a súa intención de repetir o programa en 2027, consolidando este servizo como esencial para a conciliación.

Vilaboa, 26  de setembro de 2026. – O balance do Vilaverán 2026, o programa municipal de conciliación que cada verán ofrece unha alternativa educativa e de lecer para a infancia do municipio, confirma o éxito dunha edición marcada pola alta satisfacción das familias. O dato máis significativo é que o 94% manifesta a súa intención de repetir en 2027, unha cifra que reforza o carácter consolidado dun servizo que combina convivencia, inclusión e apoio real á conciliación.

Nesta edición participaron 101 menores, que completaron 234 quendas e máis de 1.311 horas de actividade, entre horario normal e horario amplo. As dúas primeiras quendas acadaron ocupacións do 71 % e 77 %, respectivamente, mentres que as quendas terceira e cuarta se situaron no 45 % e 41 %, mantendo a tendencia habitual dos meses de agosto.
O Vilaverán mantivo a súa aposta pola diversidade familiar e pola inclusión: participaron 47 nenas e 54 nenos, 10 menores con discapacidade, 25 grupos de irmáns, 4 familias numerosas e 7 familias monoparentais. A distribución por idades concentrouse entre os 4 e os 7 anos, con picos de participación nos 5 anos (40 quendas) e nos 4 anos (37).
A procedencia das familias confirma o carácter municipal do programa: San Adrián (46 participantes) e Santa Cristina (21) foron as zonas con maior presenza, seguidas de Vilaboa, Figueirido e outras áreas da contorna.
O Concello mantivo o sistema de becas para garantir o acceso das familias con máis necesidades. En total, houbo 13 persoas becadas, que completaron 32 quendas e 187 horas cubertas mediante axudas municipais. O programa xerou ademais 8 empregos directos, correspondentes ao equipo de monitoras que acompañou á cativada durante todo o verán.
A análise da participación revela un alto grao de fidelización, xa que unha parte importante da cativada repetiu en varias quendas ao longo do verán. Un total de 20 menores asistiron ás catro quendas, mentres que 16 participaron en tres, 47 en dúas e 11 nunha única quenda, o que evidencia que moitas familias atoparon no Vilaverán unha solución estable e continuada para a conciliación durante os meses estivais.

As enquisas de satisfacción amosan unha valoración moi positiva das familias, con maioría de respostas entre “algo satisfeitas” e “moi satisfeitas” en todos os indicadores avaliados. Os comentarios cualitativos reforzan esta percepción: “El niño lo pasó bien y siempre traía anécdotas que contar… para el año quería volver” ou “Encantados con los monitores de este año, encantadores y muy profesionales”. As suxerencias prantexadas polas familias nestas enquisas tamén serán tidas en conta de cara a vindeiras edicións.

A concelleira de Igualdade, Carmen Gallego, destacou que o Vilaverán é “un exemplo de como a conciliación pode ser unha política pública útil, accesible e transformadora”. “Este programa demostra que cando se aposta pola conciliación de verdade, con recursos, con profesionais e con sensibilidade social, as familias responden. Que o 94 % queira volver é a mellor avaliación posible. O Vilaverán é convivencia, é igualdade e é tamén unha forma de garantir que a infancia de Vilaboa teña un verán seguro, educativo e feliz”.

Gallego subliñou ademais que o Concello seguirá reforzando o programa:“Imos continuar mellorando a organización, ampliando recursos e escoitando ás familias. A conciliación non é un luxo: é un dereito, e en Vilaboa imos seguir defendéndoo”.

O suplemento de crédito permite reforzar a prevención de incendios, a seguridade viaria, melloras nas casas de cultura de Riomaior e Figueirido.

Vilaboa,  29  de xullo de 2026. – O pleno de Vilaboa aprobou onte unha modificación de crédito por importe de 950.000 euros, financiada integramente con remanente líquido de tesourería, que permitirá afrontar actuacións prioritarias en servizos básicos, infraestruturas e equipamentos culturais. O expediente, que quedou definitivamente validado tras a sesión, reforza partidas insuficientes para acometer investimentos que non poden demorarse, entre elas a prevención de incendios forestais, a conservación de camiños, a mellora da seguridade viaria e a reparación das casas de cultura.

A partida máis destacada corresponde á prevención de incendios, cun investimento superior aos 137.000 euros para a adquisición dun vehículo multifunción, unha motobomba, utillaxe específica e material de protección, co obxectivo de incrementar a capacidade de resposta municipal ante emerxencias e garantir a seguridade da veciñanza e do medio natural.

Tamén se inclúe a renovación da instalación semafórica en varios cruzamentos con pasos de peóns, por 52.363,80 euros, e a colocación de marquesiñas nas paradas de transporte público, cunha achega de 20.000 euros destinada a mellorar a accesibilidade e a comodidade das persoas usuarias.

No capítulo de infraestruturas, o suplemento permitirá executar reparacións no camiño de Paradellas e actuacións no marco do Plan Marco 2026-2027, como a mellora do camiño rural de Casfalcón, que suman máis de 200.000 euros en novas inversións de reposición. A Carretera Vella de Paredes recibirá un incremento para afrontar o modificado do proxecto derivado do soterramento das redes aéreas, ademais da partida correspondente á dirección de obra.

En materia cultural, destínanse 100.000 euros á reparación das casas de cultura de Figueirido e Riomaior e 15.000 euros á redacción do proxecto da futura casa de cultura de Bértola. O desenvolvemento local tamén se ve reforzado coa achega municipal de 9.134 euros ao proxecto “Roteiro Tradicional Pesqueiro Punta do Aradoiro”, subvencionado pola Consellería do Mar e o GALP Ría de Vigo-A Guarda. O expediente complétase con diversas actuacións culturais, reparacións de saneamento, asistencias técnicas e suministros necesarios para garantir o funcionamento diario dos servizos públicos.

Exención dun Plan Financieiro
Xunto a esta modificación de crédito, o pleno tomou coñecemento da exención da obriga de elaborar e manter un Plan Económico-Financeiro (PEF) para os exercicios 2026-2027, ao abeiro do Real Decreto-Lei 13/2026, de 2 de xuño. A liquidación do orzamento de 2025 reflectía un incumprimento da estabilidade orzamentaria e da regra de gasto, o que activaba automaticamente a elaboración dun PEF. Porén, o novo marco normativo establece unha excepción para aquelas entidades locais cuxo incumprimento derive do uso do remanente de tesourería ou do exceso de financiamento afectado, como ocorre en Vilaboa. Isto supón que o Concello queda liberado das medidas cercitivas previstas na Lei Orgánica 2/2012, eliminando restricións adicionais e permitindo unha xestión económica máis flexible sen renunciar ao rigor.

Desde o goberno local subliñan que estes acordos “permiten deixar atrás un escenario de restricións inxustas para un Concello sen débedas, que paga rápido e que ten aforros para gastar e, ao mesmo tempo, activar investimentos moi necesarios para o día a día da veciñanza, especialmente en materia de prevención de incendios, mantemento das infraestruturas e mellora dos equipamentos culturais”.